သားမြေးတို့တွက် ကြိုးစားစို့
• ငါ သာလျှင် တော် ၊ သူ မတော် ဟု
လူတော် ထင်ပါ ၊ တို့မြန်မာကို
ဘယ်ခါ ဆယ်၍ ရမလဲ ၊၊
ကြွားရင်းနှင့် နစ် ၊ ဝါးရင်း နစ်သည့်
နစ်လျက်နေပါ ၊ တို့မြန်မာကို
ဘယ်ခါ ဆယ်၍ ရ မလဲ ၊၊
• အကောင်း ဆိုးထင် ၊ ဆိုး ကောင်းထင် နှင့်
အထင်လွဲပါ ၊ တို့မြန်မာကို
ဘယ်ခါဆယ်၍ ရမလဲ ၊၊
သူ့ကို ငါညှိုး ၊ ငါ့ သူညှိုးနှင့်
အညှိုးကြီးပါ ၊ တို့မြန်မာကို
ဘယ်ခါ ဆယ်၍ ရမလဲ ၊၊
• ညည်း၍ မပြီး ၊ ညူ မပြီးဘူး
အပြီးတကာ ၊ လုပ်နိုင်ပါမှ
တော်ရာရောက်လိမ့် နောင်အဖို့ ၊၊
နိုးကြ ထကြ မြန်မာတို့ ၊၊
သားမြေးတို့တွက် ကြိုးစားစို့ ၊၊ ၊
( မင်းသုဝဏ် )
---------------------------------------------------------------
ခေါင်းစဉ်မေ့နေပါသည်
ရွှေဂုဏ်ငွေဂုဏ် ရာထူးဂုဏ်သည်
လူ့ဘုံလောက အကာမျှတည့်
သူကငြူစူ မကြည်ဖြူက
ခွါယူ၍ရ၊ ကွာ၍ကျ။
ရိုးဂုဏ်ဖြောင့်ဂုဏ်
ယဉ်ကျေးဂုဏ်သည်
လူ့ဘုံလောက နှစ်သာရတည့်
သူကငြူစူ မကြည်ဖြူလည်း
ခွါယူမရ ၊ ကွာမကျ။
(ဇော်ဂျီ)
------------------------------------------------------------------
ရုရှားစာရေးဆရာကြီး တော်စတွိုင်းအား ချီးကျူးဂုဏ်ပြုထားသောကဗျာပါ...
သူ
လူသားကောင်းကျိုး၊ သူမျှော်ကိုး၍
ကြိုးစားသမှု၊ စာပေပြုသည်
ရွှေမှု ငွေမှု သူမရှု။
စည်းစိမ်ဥစ္စာ၊ ဂုဏ်ရှိန်ဝါကို
ကောင်းစွာထင်ထင်၊ အပြစ်မြင်၍
သူလျှင်မမှု လျစ်လျူပြု။
လူသားကမ္ဘာ၊ လူ့ရပ်ရွာဝယ်
မေတ္တာသည်သာ၊ ခိုလှုံရာဟု
သူ့မှာမြင်သိ ခံစားမိ။
အို-ရှုစမ်းပါ
“ငါ့မှာအစာ၊ ၀တ်စရာတို့
ပေါကာများကာ၊ ရှိနေပါလည်း
သူ့မှာမဲ့လျင်း၊ စားဝတ်ကင်းသော်
ရင်တွင်းငါ့တွင်၊ ဘယ်မှာရွှင်လိမ့်”
သို့လျှင်တွေးရှု၊ စာနာမှုဖြင့်
လူထုကြားဝယ်၊ စည်းစိမ်ပယ်၍
လယ်ယာလုပ်သား၊ ဆင်းရဲသားနှင့်
တသားတည်းသာ၊ နေထိုင်ပါ၍
မေတ္တာပွားမှု၊ သူကျိုးပြုသော်
သူ့ကိုစာဆို၊ မြတ်နိုးပို၍
ကြည်ညို ရှိခိုးမိပါသည်တကား။
(မင်းယုဝေ)
Subscribe to:
Post Comments (Atom)
No comments:
Post a Comment